بدايةً لازم نعرف الفرق بين موظف خدمة العملاء وبين موظف المبيعات المسؤول عن جذب عملاء وطلبات للمتجر أو الخدمة هو موظف المبيعات خدمة العملاء مسؤول عن رضا العميل عن الخدمة ويكون هو حلقة الوصل بين العميل والمؤسسة

ولكن بما إننا نتكلم عن العمل عن بعد والمشاريع الصغيرة

أغلب المتاجر الإلكترونية توظف شخص للر على العملاء وتعطيه عمولات على كل طلب يتم عن طريق المحادثات فهنا صار موظف خدمة العملاء موظف للمبيعات أيضاً.

في الأساس خطأ تجمع وظيفتين لموظف واحد ولكن إذا فيه رضا بين الطرفين وتدريب جيد للمهام المطلوبه ممكن يمشي الموضوع

تعالوا نشوف موظف خدمة العملاء إيش المهارات المطلوبه منه:

_معرفة كل تفاصيل المشروع والخدمة أو المنتج المقدم بحيث يكون جاهز للإجابة عن أي سؤال.

_لباقة في الحديث وسرعة في الكتابة والرد على الإتصالات.

—معرفة فن التعامل مع أنواع العملاء وأساليب شكر العميل الراضي أو تهدئة العميل الغاضب

وعشان تصير موظف خدمة عملاء مافيه زيك راح أعلمك نقاط بسيطة:

-إبدأ المكالمه أو المحادثة بالتعرف على اسم العميل والترحيب فيه وبعد كذا الإجابة على سؤاله.

-لما يسأل العميل عن سعر المنتج أو الخدمة لاتعطيه السعر مباشرة

وضح له مميزات المنتج أو الخدمة أولاً وبعدها اذكر له السعر

بعد ذكر السعر ممكن تعطيه مميزات المتجر من ناحية الاستبدال والاسترجاع أو تعرض عليه خصم خاص.

خلي كلامك مختصر مفيد مافيه إلحاح ولاإقناع

مهمتك فقط إنك توضح للعميل المزايا اللي بيحصل عليها اذا اشترا منكم.

-لو حصل وجا عميل فرغ غضبه فيك إياك والجدل والنقاش معاه

انهي الحوار برفع الموضوع لإدارة المتجر يتواصلون معاه.

لاتاخذ الامور بشكل شخصي أبداً.

-بشكل مستمر اجمع أكثر الأسئلة الشائعة اللي توصلك وارفعها لإدارتك ممكن يستفيدون منها في صناعة محتوى أو تُكتب في صفحة الأسئلة الشائعة في الموقع.

-اطلب من إدارتك أسماء أهم العملاء عشان يكون لهم أولوية في الرد ومعامله

خاصة

-اذا المشروع مبتدأ يُفضل انك تعمل لهم قائمة بأرقام أو إيميلات العملاء اللي تواصلوا وسألوا أي سؤال يخص المشروع(جمع بيانات).

_تواصل  مع العملاء بعد كم يوم من السؤال اذا كان أتمم الطلب أو يحتاح لمساعدة منك. (الإهتمام يجيب الولاء )

بعد ماتعرفت على المهام المطلوبه منك صار وقت إنك تضيف القدرة على خدمة العملاء في السيڤي تبعك

وبكذا تتقدم بطلبك بالتواصل مع الشركات والمتاجر الإلكترونية المتوسطة والكبيرة

* رحب بفترة تجربة بدون راتب لمدة اسبوع مثلاً منها تكتسب خبرة عملية وكمان تعطي صاحب المشروع ثقة في عملك.

الراتب المتوقع لموظف خدمة عملاء عن بعد من1000ريال(للمتاجر  المتوسطة) وتصل إلى3000ريال للشركات والمتاجر الكبيرة.

تحذيرات

لاتشتغل أكثر من8 ساعات يومياً 

(بدون أوڤر تايم)

-لاتتعاقد شفهياً.

-مهامك وساعات العمل والراتب ومدة العمل ضروري تكون موثقة بعقد رسمي موقع منك ومن صاحب العمل

وأخيراً:

تذكر دائماً إنك واجهة المشروع فأي خطأ منك ممكن يأدي لتشويه سمعة المشروع وممكن تكون خدمتك الجيدة هي نقطة القوة والميزة التنافسية للمشروع

شكراً إنك وصلت لنهاية الموضوع

يومك سعيد